Кна велке унала

Тений Марий Эл гыч Кнавелке Марий талешке кечылаште тоштер пашаеҥ-влак дене пырля «ВийАр» тÿвыра (культур) кыл ушемын еҥже-влак поэтесса Раисия Сунгурова ден Ирина Ташбулатова толын коштыныт.
Раисиян ты кундем нерген почеламутшо шочын. Кызыт ме тудым лудшына-влаклан темлена. Ӱшанен кодына, «мондалтше» Кнавел нерген ончыкшым ятыр возаш тÿҥалыт.

КНА ВЕЛ

Кукмарий пеледеш тÿзланалын,
Кава кандым поген, мланде ям ден илен.
Кукмарий кундемеш алым налын,
Кнавел волгалтеш тÿсшö ден, чапланен.

Припев:
Кнавел – унавел, Юмо вер –
Марий мланде ила чапланен.
Кнавелне волгалтше куанле у эр
Вий-куатым сийла йолваж ден.

Тиде мландыште мыйын родем-влак,
Пагален ваш, илат, еш пиалым чоҥат.
Улыт тÿняште пеш ятыр кундем-влак,
Кугезе кумыл ÿжеш Кнавелкак гына.

Масер курык оҥ, Сеҥер олык куэрым
Уял, Курукумбал вий-куат ден ушен,
Кнавел, саламлет тый суапле у эрым,
Вашлият йöратен, чий куат ешарен.

Снимкыште: поэтесса Раисия Сунгурова Курукумбал тÿҥалтыш школысо парт коклаште. «Тунемаш – тиде сай!»
Лайд Шемйэрын фотожо.

Реклама