У ий дене! У вий дене!

Редакторын шомакше

«КнаВел» газетна икымше гана 2009 ий апрель (вÿдшор) тылзыште лекте. 2-шо номерым ме пеледыш (июнь) тылзыште савыктышна. Но кеҥеж тургым пагытыште газет дене шогылташ жапна ыш лий. Вет ме редакций огынал, а газетым лукташ кумылан самырык ÿдыр-рвезе-влак гына. Вес амалжат ыле: газетлан сай материал кÿлеш, тудо калыклан кугу уверым намийышаш да мемнан кундемнан илышыжым, тачысе вашталтыш-влакым, менан сеҥымашна ден ситыдымашнамат почын ончыктышаш.

Вес йодышат уло – тиде окса йодыш. Газетым лукташ ме оксам икте-весе коклаште шкеак погена. Тачеш мыланна районат, республикат, ик кумырымат ок пу, йодынат огынал. Марий Эл гычынат йодмаш уке. Кеҥежым ме чыланат пашам ыштенна да Российын тÿрлö кундемлаштыже лийынна. Казыр тидын нергенат сераш да иктешлаш кумыл уло.

Ынде У ият толын шуэш, лач паша саскам иктешлыме пагыт. У номерым ямдылыме дене ме кеҥеж-шыже жапыште шуктымо пашаланна акым пуэн кертына. Тыгодымак Кукмарий-Кнавел кундемысе ял калыкын ончыклык нерген шонымашыжым, планжым почын ончыктена. Вийна сита манын ÿшанена.

Вет ме ял калыкын вийже дене, икоян улмына дене кеҥеж да шыже жапыште шуко мер (общественный) пашам шуктенна. Тидын годым ик йодыш эреак эн тÿҥ лийын: ме шкаланна шке огына ыште гын, ончык кайышаш йöным огына кычал гын, тидым мыланна «налза!» манын, иктат конден ок пу. Сандене Кна марий кокла гыч тидым кажныже шарнышаш. Тиде ÿжмаш денак илышаш. Самырыкше – самырык семын, илалшыже илалше семын умылен. А йоча-влаклан ме пример лийшаш улына. Тидым моло-влакат ушеш пыштышаш улыт.

Пашанам икмыняржым гына палдарен кодынем:

– 13 июнь (пеледыш) – Курукумбал ялыште «Марий кас» лÿман кугу пайрем;

– Тиде кечылаштак Кнавел калык Кукмарийыште эртыше Сабантуйышто шке чолгалыкшым ончыктен, ятыр таҥасымаште сеҥышыш лектын;

– 25 июль – «Марий Эл Радион» концертыштыже «Кна вел» ансамбльын, «ВийАр» ушемын, «КнаВел» самырык ушемын чолга еҥже (членже) Роман Назыров (Уял гыч) Йошкар-Оласе «Строитель» стадионышто мурызо семын выступатлен, лаурет лÿмым да «Йöратыме мурызо» суап лÿмым сеҥен налын.

Роман Назыров тыгак Мер Каҥашын эртарыме марий самырык-влак слётышто, проектым ышташ туныктымо семинарлаште участвоватлен. Варажым проект сомыл дене Финляндийысе Тампере олашке миен коштын (октябрь тылзыште).

– «КнаВел» самырык ушем да верысе активист-влак «Тÿрлö кундемлаште илыше марийын фольклор пайремже» проектым ямдылен, тÿрлö инстанцийлаште араленыт. Тиде проект почеш 2010 ий июнь тылзыште Кна велне ты пайремым эртараш палемдыме.

– Шыже пайремым эртаренна.

– «Кна вел» фольклор ансамбльна дене 1 ноябрьыште Озаҥыште эртыше «Калык келшымаш» пайремыште лийынна. «Шокшым пуэнна». Одо, руш, татар калык дене тÿвыра кылнам пеҥгыдемденна.

– У ийым шке шочмо ялыште самырык калык дене веселан да пайдалын эртараш тÿҥалына.
Чыла тидым шотыш налын, «КнаВел» газет умбакыжат лектын шогаш тÿҥалеш манын ÿшандарен каласена.

Маскэҥер УЯЛН,
редактор